Tag: 反圍標

https://www.youtube.com/watch?v=Nor1EcqXl78&feature=youtu.be 《建築物管理條例》是一隻無牙老虎，對住法團、管理公司、工程公司組成的圍標集團全無阻嚇性。全港業主反貪腐反圍標大聯盟發言人趙恩來，幫過廿多個屋苑對抗天價維修，見盡圍標集團如何欺壓小業主。 圍標集團其中一個最常用的手段就是剝奪業主的選擇權。趙恩來以荃灣麗城花園三期為例，今年年中收到政府修葺令，需要就外牆的一個失修地方進行修葺工程。法團索取顧問報告後拋出三個方案，竟沒有一個只做政府要求的工程，最平的八千多萬元，最貴的更要兩億，比原本預期貴四至十倍。 他又接觸過另一些個案：法團為了令大維修通過，會「善用」業主大會中，授權票這一機制：找保安員叩門索票、扮反大維修一方索取簽名、做假授權票、甚至出錢買票，各種黑色手段都出齊。 趙恩來認為，條例的漏洞亦令小業主無從反擊。若小業主想推翻大維修，需要集合超過百分之五的業權簽名，再交予法團主席，由他召開業主大會商議。但不少法團主席在大維修通過後，卻刻意辭任主席一職，令位置真空，無人有權召開大會。幸好大圍富嘉花園的圍標案中，法庭最後頒令解散該法團，成為案例，才杜絕這情況。 但《建築物管理條例》依然是漏洞百出，法團更在絕大部份情況下不需負刑責，小業主只能用自己錢向涉事者民事索償，法團卻用業主們的管理費請最好的律司對簿公堂。反圍標的戰爭，小業主仍是弱勢一方。 （原文刊載於《壹週刊》2016年1月5日）

https://www.youtube.com/watch?v=IiVICnb2q0A&feature=youtu.be   趙恩來，三十歲，工黨社區幹事、兩年前成立全港業主反貪腐反圍標大聯盟，處理過約二十宗個案。他曾經做「無間道」任田北辰的競選助理，因而知悉建制派與法團的關係。反圍標反得多，最深刻戰場是他的家，和一班年輕業主聯手chur爆求變。 好多大廈法團，同建制派關係千絲萬縷，政黨同法團主席成日飲茶灌水，有啲大廈甚至由親中區議員做埋主席。到選舉就發功，口話禁止宣傳，實際上，主席護住建制派候選人去拍門，或者搞嘉年華會、酒樓聚餐，搵候選人做嘉賓派禮物，贏晒居民印象分。 偏偏呢類法團特別鍾意搞維修，連我由細住到大嘅荃灣荃威花園都唔例外，十幾年前每戶已經夾過八萬元，點知上年又話要再申請房協資助做維修。十幾間顧問入標，法團篩剩四間俾大家「假普選」，主席周圍問人拎授權票，揀咗間顧問費係市價三分一嘅，令大家以為執到寶。點知間公司交上嚟份報告，工程範圍同面積冇寫，材料淨係寫幾貴但唔講物料，最後工程估價高達一億七千幾萬元，貴過市價起碼兩、三成。法團同顧問係咪有親就真係唔知，但個建制派區議員就不停出海報、搞街站撐大維修。 好似我老豆咁嘅老業主，大多數唔知頭唔知路，好彩荃威夠偏僻，近年吸引一班後生仔貪平買樓。有幾個唔怕事嘅不停追問，但法團好快盯到實，例如佢哋寫文宣入信箱被管理員阻撓，攝入住戶鐵閘又被偷。佢哋於是嚟搵我幫手，我叫佢哋先同相識嘅鄰居「口耳相傳」，建立一個幾十人嘅核心小組。 【團結】 我雖然喺組織同法律上提供意見，但過程中盡量低調，費事有人話政黨介入。最後二、三十個小業主，竟然勤力到兩、三個禮拜內，向三千四百幾戶人拍門講發生咩事。四個月後，終於籌夠業權份數開大會，決定係咪推翻大維修。 開會前，法團又用舊手段，刮咗四百幾張授權票，見反大維修嗰邊得六十幾張，諗住「坐定粒六」，搵埋民建聯立法會議員陳恆鑌等建制友好到場，見證勝利一刻。但正式投票嗰晚，竟然有千六個業主親自嚟投票，見到陳恆鑌仲指住嚟鬧。住咗荃威三十年，喺山邊食正冷風，喺呢晚見住班業主團結chur到盡，最溫暖最可愛。 上個月班居民再出動，KO成個建制法團，換過班新人。但舊法團好似「小強」，唔肯交數簿出嚟不特止，仲出律師信話業主大會嘅程序中有隻字錯咗，管理公司又唔肯同新法團合作。點解可以咁？呢個問題真係要問政府。法團就算同顧問、工程公司一齊圍標，政府都冇得刑事檢控，ICAC又無法出手。一日未修改《建築物管理條例》重罰圍標，小人依然會利用法團搵食玩死小業主。呢場仗，仲有排打。 （原文刊載於《壹週刊》2016年1月5日）