Tag: 個案跟進

大角嘴街市近期出現嚴重漏水問題，攤檔同走廊嘅天花不時有「水柱」流下，協助商戶嘅前區議員趙恩來同Emily講，街市自一個月前開始漏水，建築署曾派人視察，但情况無改善，商戶損失大批貨品包括海味等年貨。商戶要求食環署盡快維修，短期內可以安排佢哋到其他空置攤檔，並賠償損失。建築署就話係防水層問題，要過埋年先做防水工程。 趙恩來質疑裝修低質　建築署料防水層破損 趙恩來話，漏水位置喺街市一樓乾貨區，波及至少10個商戶，日前更加因為漏水「連燈都燒埋」。佢話𠵱家正值歲晚市民辦年貨，商戶損失慘重，批評食環署同建築署一直未向商戶交代漏水成因，亦無公布維修日期。佢話大角嘴街市做完裝修工程無耐，質疑施工質素差導致漏水。 食環署回覆，去年12月底接獲一宗相關投訴，已轉介畀相關部門跟進，會同受影響檔戶保持溝通。建築署就話，估計因街市二樓去水口附近防水層破損導致漏水，已安排安裝臨時水盆，同埋喺滲漏位置塗上防水物料，計劃農曆新年後做防水工程。 （原文刊載《明報》2023年1月13日）

香港男子籃球代表隊前成員司徒偉傑，遭甲一球隊飛鷹拖欠薪金，球隊以去年賽季延期為由拒絕出糧，更不承認與他有僱傭關係。司徒偉傑決定告上勞資審裁處，最終獲判勝訴，飛鷹須支付3萬元欠薪。不過換來的是，飛鷹拒絕「取消」司徒偉傑的註冊，他今季未能轉會及「被休息」。司徒偉傑接受《獨媒》訪問時對事件感到無奈，「我一路都預咗攞唔返筆錢，『打官司』主要係攞返個公道，宜家係攞到㗎。」 35歲的司徒偉傑，身高1.95米，15歲便開始打籃球，入選港青、20歲正式打甲一組籃球聯賽，第一支效力的球隊是福建，因為NBA球星奧尼爾，場上位置同樣是中鋒所以穿34號球衣。 父母認為做運動員搵唔到食，司徒努力用行動說明，二十出頭已一邊打甲一，一邊教波賺錢，「打波嘅錢其實唔係好多，啱啱新入去福建嗰年都淨係得車馬費。嗯，後尾除返開，搭車、食飯嗰啲囉。」 三年前簽約飛鷹 前年球季取消、去年球季延期 籃球生涯先後效力福建、晉龍、永倫，司徒偉傑曾以23歲之齡，首次入選香港男子籃球代表隊，「可以代表自己住嘅地方去打比賽好開心，見識到出面世界嘅人打籃球係點樣」，最難忘要數2018年印尼雅加達亞運。 司徒在2019年10月加盟飛鷹，但這成為了他的惡夢。甲一組籃球聯賽近年安排在每年3月或4月開始，最遲在同年8月完季。籃總宣布2020年球季因疫情取消，2021年球季則延期至同年12月初舉行，在今年1月再爆第五波疫情，至7月中才重開，「打極都未打完」，到今個月才上演季後賽。 飛鷹在2019年10月向司徒開出兩個年度的合約，每年度9萬元分三期出糧。球隊在2019年12月向他出了首期薪金，翌年爆發新冠疫情，籃總在3月宣布將銀牌及聯賽賽事延期舉行。飛鷹當時表示，領隊因為疫情未能回到內地，無法將錢帶返香港，一度出現拖糧。後來就是一波又一波的疫情，疫情下司徒轉行做運輸、凍肉拆櫃，又去送口罩。 直至2020年8月初，球隊終於再次出糧，給司徒再入了1萬元，前後共4萬元。不過，籃總就宣布，因應康文署場地關閉，取消2020年度的銀牌及聯賽，下年度的球季，暫定不早於2021年8月舉行。 拖糧當無事發生 去年8月尾提續約 當球場重開，已是去年8月尾的事。司徒與飛鷹的合約，在2021年8月30日完結，球隊在8月初將「尾期」的5萬元發給他。這時候，飛鷹助教跟司徒說：「你完約喎。會跟返你上年個價，銀牌前三日出俾你，聯賽前三日出俾你，聯賽後三日出俾你。」 「完約？你淨係出咗一季糧咋！」這是司徒當時的第一個念頭，他想了想回覆：「你找咗數先好同我講其他嘢啦。」助教傳來三張入數紙，反問：「仲差你咩？未出晒俾你咩？」 「我簽兩個年度俾你，19年10月到20年8月計第一個，20年10月到21年8月計第二個喎，我淨係收到第一個年度。」司徒一再強調這個說法，不過飛鷹「唔係咁諗」，球隊顯然欲當無事發生，「順應」籃總球季延期的說法。 司徒對球隊表示，曾參考勞工處的資料，拖欠薪金屬刑事罪行，「你無比賽，但我有練波㗎嘛，無理由你唔出俾我㗎嘛。我嗰陣覺得咁大間球會，甲一組唔係好多隊波嘅啫。」 發律師信要求追回首季薪金 「打個波啫，我都無做錯嘢」 「第一個球季，我有練波，有打嗰啲工商盃、元旦盃，未有疫情之前我打齊晒比賽，有疫情你無銀牌無聯賽，有練波你糧照出。但第二個球季，都係因為疫情影響，無比賽有練波，但無糧出，我覺得唔合理。」 飛鷹曾問司徒會否和解，他回覆稱，沒有比賽不是自己控制範圍之內，只要求取回「練波」應得的薪金，即4.5萬元。在9月初的時候，有前隊友喚司徒加盟南青，他在完約後立即跟操。司徒在事前曾寫信向籃總「備案」，指和飛鷹已經完約，不會再代表該支球隊上陣，籃總則回覆稱，不會參看球隊與球員的任何合約。 緊接而來的是，噩耗來了。飛鷹向司徒發律師信，指控他轉投另一支球隊，更要追回2019年球季的全數薪金。在收到信後，司徒感到既無奈又搞笑，「打個波啫，我都無做錯嘢。」 ...