特首林鄭月娥拒絕封關，令到香港武漢肺炎疫情蔓延，要列舉林鄭班子抗疫工作，只數到一連串公關騷，娥特5號去咗工聯會做接線生，之後一連兩日微服出巡，6號視察郵政九龍特快專遞運作中心，7號再去大帽山郊野公園視察漁護署喺疫情下嘅管理情況，而佢噚日開po話視察大帽山郊野公園時，講返探訪咗經營茶水亭廿幾年好受行山人士愛戴嘅蓮姐，結果被荃灣區議員、工黨趙恩來鬧佢好虛偽。
話說娥特提及蓮姐分享咗2016年寒流襲港時，喺茶水亭連續40小時不眠不休工作，支援紀律部隊拯救被困市民嘅往事，令人好感動，仲話知道蓮姐下個月會搬去距離現址不遠、郊野公園訪客中心隔離嘅茶水亭繼續經營，見證漁護署進一步優化郊野公園工作喎。可能大部份人見到個po，第一時間只想問林鄭點解去幾乎旺過旺角嘅郊野公園都唔戴口罩？但大帽山當區區議員趙恩來就話自己第一個反應係：「天下間竟有人如此虛偽！！」，斥娥特輕輕帶過蓮姐搬地方嘅背後係個悲慘故事。
Related articles
趙恩來話蓮姐之前接到漁護署單方面通知不獲續約，最後能夠搬地方繼續經營，全因有網民發起10萬聯署撐蓮姐，佢亦透過各種渠道聯絡漁護署，希望署方重新考慮蓮姐對大帽山嘅貢獻，保留大帽山嘅集體回憶，幾經交涉，漁護署先肯安排附近訪客中心空置小食亭檔位畀蓮姐，但呢個位置比較偏僻，人流亦較少。
而娥特之所以仲可以同蓮姐喺搬遷前傾到偈，全因武漢肺炎疫情影響，漁護署酌情暫時延長大帽山茶水亭經營權咋，難怪趙恩來見到娥特個po無明火起，怒轟林鄭高度讚揚蓮姐對大帽山嘅貢獻係「消費蓮姐」。
（原文刊載於《蘋果日報》2020年3月8日）
