近年的反圍標運動，令小業主覺醒，把建制派友好把持的法團逐個擊破，令建制派政黨不能如以往大模斯樣進出屋苑搞「蛇齋餅糭」兼作洗樓式選舉宣傳，協助小業主的民主派終突破重門深鎖，其中獲民主派協助反圍標的荃景圍一帶，多個屋苑的建制派法團兵敗如山倒，反圍標大聯盟發言人、工黨趙恩來指，此山頭由以往近乎一片紅，如今一半已光復，有利泛民日後在區選舉部署，這位反圍標戰將亦有意再戰荃灣。
論荃灣的政治版圖，在荃灣成長的趙恩來說，這區一直是建制派天下，在荃景圍一帶，民主派以往走進由建制派把持的法團屋苑，是自討苦吃：「好似而家喺荃威花園咁，如果我哋三五年前入到屋苑，有一班保安已經圍著、阻撓我哋，與此同時，電梯大堂，都會有如牆紙嘅建制派區議員或者社區幹事嘅宣傳海報，大時大節，中秋、過年，大家又會見到建制派、民建聯立法會議員，走嚟搞盤菜宴、中秋晚會，派月餅，派糭等，今時今日，呢樣嘢大家唔會再見到。」
Related articles
多個由建制派把持的大廈法團逐個敗走，均是小業主逐個抬頭的故事。像荃威花園的個案，約三年前一場大維修，天價維修令小業主覺醒，合力推翻工程，「之後順勢仲推翻埋一個個建制派法團。」勝仗消息傳千里，荃灣區內，千里台、朗逸峰、麗城花園三期、荃灣中心一期，故事大同小異，小業主眼見荷包將被淘空，起義說不。
在多場反圍標戰役均有其身影趙恩來指，不少站出來的業主，以往不問世事，「佢哋喺反圍標抗爭走咗出來，發現個世界真係咁唔公道，嘗試參與社區事務，慢慢協助民主派嘅義工工作，由以往一隻港豬，變成唔再係豬。」
他認為近兩年區內屋苑成功反圍標，令不少法團的話事人改頭換面，變成民主派的友好，料有利日後民主派選舉：「以前舊法團唔畀你（民主派）參與法團會議，今時今日大家（民主派）都可以進入列席會議，或者都會（與法團）多搞咗交流會。」
還有兩年便是區議會選舉，民主派已協調區選，上屆在愉景選區敗於田北辰的趙恩來坦言，積極考慮擇區再戰，但落腳哪一區尚未有定案，光復的荃景圍至少涉三個區議會選區，希望民主派在此優勢下派人出戰。
（原文刊載於《蘋果日報》2017年10月20日）
