香港男子籃球代表隊前成員司徒偉傑，遭甲一球隊飛鷹拖欠薪金，球隊以去年賽季延期為由拒絕出糧，更不承認與他有僱傭關係。司徒偉傑決定告上勞資審裁處，最終獲判勝訴，飛鷹須支付3萬元欠薪。不過換來的是，飛鷹拒絕「取消」司徒偉傑的註冊，他今季未能轉會及「被休息」。司徒偉傑接受《獨媒》訪問時對事件感到無奈，「我一路都預咗攞唔返筆錢，『打官司』主要係攞返個公道，宜家係攞到㗎。」
35歲的司徒偉傑，身高1.95米，15歲便開始打籃球，入選港青、20歲正式打甲一組籃球聯賽，第一支效力的球隊是福建，因為NBA球星奧尼爾，場上位置同樣是中鋒所以穿34號球衣。
父母認為做運動員搵唔到食，司徒努力用行動說明，二十出頭已一邊打甲一，一邊教波賺錢，「打波嘅錢其實唔係好多，啱啱新入去福建嗰年都淨係得車馬費。嗯，後尾除返開，搭車、食飯嗰啲囉。」
三年前簽約飛鷹 前年球季取消、去年球季延期
籃球生涯先後效力福建、晉龍、永倫，司徒偉傑曾以23歲之齡，首次入選香港男子籃球代表隊，「可以代表自己住嘅地方去打比賽好開心，見識到出面世界嘅人打籃球係點樣」，最難忘要數2018年印尼雅加達亞運。
司徒在2019年10月加盟飛鷹，但這成為了他的惡夢。甲一組籃球聯賽近年安排在每年3月或4月開始，最遲在同年8月完季。籃總宣布2020年球季因疫情取消，2021年球季則延期至同年12月初舉行，在今年1月再爆第五波疫情，至7月中才重開，「打極都未打完」，到今個月才上演季後賽。
飛鷹在2019年10月向司徒開出兩個年度的合約，每年度9萬元分三期出糧。球隊在2019年12月向他出了首期薪金，翌年爆發新冠疫情，籃總在3月宣布將銀牌及聯賽賽事延期舉行。飛鷹當時表示，領隊因為疫情未能回到內地，無法將錢帶返香港，一度出現拖糧。後來就是一波又一波的疫情，疫情下司徒轉行做運輸、凍肉拆櫃，又去送口罩。
直至2020年8月初，球隊終於再次出糧，給司徒再入了1萬元，前後共4萬元。不過，籃總就宣布，因應康文署場地關閉，取消2020年度的銀牌及聯賽，下年度的球季，暫定不早於2021年8月舉行。
拖糧當無事發生 去年8月尾提續約
當球場重開，已是去年8月尾的事。司徒與飛鷹的合約，在2021年8月30日完結，球隊在8月初將「尾期」的5萬元發給他。這時候，飛鷹助教跟司徒說：「你完約喎。會跟返你上年個價，銀牌前三日出俾你，聯賽前三日出俾你，聯賽後三日出俾你。」
「完約？你淨係出咗一季糧咋！」這是司徒當時的第一個念頭，他想了想回覆：「你找咗數先好同我講其他嘢啦。」助教傳來三張入數紙，反問：「仲差你咩？未出晒俾你咩？」
「我簽兩個年度俾你，19年10月到20年8月計第一個，20年10月到21年8月計第二個喎，我淨係收到第一個年度。」司徒一再強調這個說法，不過飛鷹「唔係咁諗」，球隊顯然欲當無事發生，「順應」籃總球季延期的說法。
司徒對球隊表示，曾參考勞工處的資料，拖欠薪金屬刑事罪行，「你無比賽，但我有練波㗎嘛，無理由你唔出俾我㗎嘛。我嗰陣覺得咁大間球會，甲一組唔係好多隊波嘅啫。」
發律師信要求追回首季薪金 「打個波啫，我都無做錯嘢」
「第一個球季，我有練波，有打嗰啲工商盃、元旦盃，未有疫情之前我打齊晒比賽，有疫情你無銀牌無聯賽，有練波你糧照出。但第二個球季，都係因為疫情影響，無比賽有練波，但無糧出，我覺得唔合理。」
飛鷹曾問司徒會否和解，他回覆稱，沒有比賽不是自己控制範圍之內，只要求取回「練波」應得的薪金，即4.5萬元。在9月初的時候，有前隊友喚司徒加盟南青，他在完約後立即跟操。司徒在事前曾寫信向籃總「備案」，指和飛鷹已經完約，不會再代表該支球隊上陣，籃總則回覆稱，不會參看球隊與球員的任何合約。
緊接而來的是，噩耗來了。飛鷹向司徒發律師信，指控他轉投另一支球隊，更要追回2019年球季的全數薪金。在收到信後，司徒感到既無奈又搞笑，「打個波啫，我都無做錯嘢。」
司徒翌日再去勞工處「備案」，處方在月中安排調停會議。他在會議當日早上接獲主任的電話，「對面話唔會嚟，咁你仲嚟唔嚟？」他照樣前往勞工處，原來球隊早跟處方說，「唔覺得呢個係僱傭關係」。
球隊拒和解「法庭見」 完訊後庭外流淚
「唔係僱傭關係？我有同你練波、比賽。我都叫有代表過飛鷹，你又有俾波衫我，點解要去到呢個情況呢？」人生大部分時間都係打波、教波，未曾接觸法律程序，加上未能參與甲一賽事，司徒深受困擾加上狀態欠佳，他未有再參與南青的訓練。
「好唔開心，真係好唔開心。始終運動員嘅生涯有限，咁樣搞一搞，再加埋疫情，我再有得打可能已經係36歲。」
「唔開心，唔甘心。」司徒平日會和學生到街場睇波，一度對籃球心灰意冷，連波都唔想打，亦不再入場睇波。事件最後「法庭見」，審裁官在申索開審前曾多次詢問雙方否和解，飛鷹表明不會，「其實最重要係兩個字——公道。你搞到我成季無得打，係唔合理㗎嘛。」司徒鏗鏘有力，對記者再說一遍。
有汗出無糧出 飛鷹庭上稱「你人工仲少過綜援」
不止有汗出，無糧出，還要「被休息」，這對一名運動員來說，其實無助得很。
這大概是司徒偉傑有生以來，人生遇過最冤屈的事。在完訊後，他在庭外一度情緒失控，很難想像這名大塊頭在街上流淚，「我都叫同你打過波⋯⋯就算無打聯賽⋯⋯都叫係喺你哋球隊，一個禮拜見幾次呀，你嗰啲說話可以去到咁難聽㗎呢？」
司徒引述飛鷹一方在庭上稱，其歷年效力不同球隊的年薪，除開12個月後的薪金較綜援更少，「我聽到覺得好難受。我都係打波啫，點解咁都會有錯？」
被問今季打邊隊唔識解釋 憂父擔心
司徒與父親同住，有時候電視播出體育新聞，爸爸看到有關甲一，便問他「你今年打邊隊？」司徒咬著唇，哽咽說：「我係唔識解釋，我同佢講『你唔好問啦，我唔識點答。』」爸爸至今仍未知悉事件，「嗯，係啦主要唔想佢擔心。我答完佢都有少少情緒，因為真係唔知點解釋。」
審裁官最後裁定，飛鷹與司徒偉傑有僱傭關係，不過就只判了「賠償」3萬元，將9萬元的薪金分為三部分，即訓練、聯賽及銀牌賽。「我一路都預咗攞唔返筆錢，『打官司』主要係攞返個公道，宜家係攞到㗎。」
司徒偉傑：我同自己講，真係無做錯
訪問當日在維園籃球場進行，司徒心情已平伏了很多，他笑言學會此後簽約「要擘大眼睇清楚」，「運動員嘅時間真係有限，我已經唔係18歲，咁樣無咗一年真係好可惜。」
縱使被迫「休息」，不過司徒一直健身及自行操練，準備在明年以最好的狀態重返球場。他曾想過，會否因為鬧大了事件，令其他球隊不敢邀請他加入，「但我同自己講，真係無做錯。啱定錯，我諗唔洗由我講吧。」
有份協助司徒偉傑的工黨前區議員趙恩來表示打工仔在入職簽約時，一般難以和僱主講條件，指本地籃球界，乃至體育界均有類似的假自僱情況，而且問題嚴重。「好似今次咁，球場係你book、波衫係你提供，個波係你嘅教練係你搵返嚟，幾時去練波都係你決定，事實上你就係一個勞工，明顯係對員工有控制權，存有僱傭關係。」趙恩來促請當局關注同類情況，「政府成日講幾支持運動員，但佢哋嘅生計係咪又得到保障呢？」
原文刊載《獨立媒體》2022年10月8日
