民主派區議員去年7月11、12日借出議員辦事處做泛民初選票站，事後遲遲未獲發還當月議辦開支。Emily聽聞陸續有區議員獲發還7月議辦開支，只扣除咗初選兩日款項。
荃灣區議員趙恩來同Emily講，佢位處荃威花園嘅辦事處，除咗佢冇申報初選兩日嘅開支外，上月獲發還7月租金，大約萬幾蚊，其他雜費就未得閒對數。屯門區議員何國豪就話上月底獲發還去年7月開支，但佢冇申報到初選期間嘅開支。當局咁耐先發還款項，何國豪話周轉上一定有不便，會影響到現金流。
不過，屯門區議會主席陳樹英就同Emily講，尚未獲發還開支，因為佢哋最終冇用議辦做票站，唔願意被扣款，當局持續話佢提供資料不足，目前佢已入稟小額錢債審裁處追討，案件3月再訊，翻查資料有關開支涉款約5.3萬元。民政事務總署回覆話，區議會秘書處會按指引仔細審批相關發還開支申請，檢視議辦有冇用於初選，會發信請相關議員提交書面聲明，並根據情况研究發還安排，若用於票站等與區議會無關嘅職務，開支將不獲發還。
（原文刊載《明報》2021年1月29日）
大批民主派區議員辭職，部分人思考「轉型」，諗方法延續地區工作。趙恩來（圖）前日辭任荃灣區議員，其facebook發文話「請恕怯懦未能完成四年任期」，但佢同Emily講會繼續部分社區活動，例如兒童足球訓練班、瑜伽班等，全因早前已承諾街坊，「唔能夠甩底」。至於錢從何來，趙恩來話會努力爭取資源，日後或會發起社區月捐計劃，有信心香港人會提供財政資助。 趙恩來話希望繼續保持辦事處，推行環保研究等計劃，指即使冇咗區議員，社區仍有問題要解決，要有人為社區發聲。佢話有研究偕其他辭任區議員辦活動，如社區團購，旨在保持社區嘅溫度。 有人辭任，亦有留低者做最壞打算。屯門區議員張錦雄喺區內幫2019年區選嘅競爭對手、現任屯門分區委員會委員陶錫源宣傳，掛橫額印上陶嘅聯絡資料。張錦雄講笑話，表面上係驚自己被DQ後，居民搵唔到其他人幫手，其實佢話掛橫額係一種控訴，因為分區委有權選特首，職能重要，但日常生活中街坊根本聯絡唔到呢啲委員。 （原文刊載《明報》2021年7月20日）
Read more
現時公職：
- 荃灣區議員（荃威選區）
- 荃灣區議會交通及運輸委員會主席
- 工黨執行委員
- 民主動力執行委員
- 荃威花園業主立案法團秘書
- 全港業主反貪腐反圍標大聯盟發言人
- 香港市民支援愛國民主運動聯合會常務委員
