支聯會以往每年6月4日都喺維園舉行集會，去年警方首度因疫情為由反對，多名常委、民主派仍到維園悼念，其後24人被控煽惑他人參與未經批准集結等罪；部分被告認罪。案件今日審理，部分人將認罪，包括支聯會前常委趙恩來(圖)，佢喺facebook發文，預計會即時還押、刑期唔短，需暫別大家；但強調即使不能親身處理地區個案，但富經驗嘅助理可代勞，堅守陣地、深耕民主。
趙恩來話，兩年前邊個都諗唔到港人點亮維園燭光、高呼民主自由、悼念民主烈士，要付上身陷囹圄嘅代價；佢慨嘆當權者「以『法律』之名，行專政之實」，又指有人為求自保、選擇自劃紅線、一退再退，「但最終也避不過滅頂之災」。
Related articles
籲勿揣摩紅線：永超常人理解
趙恩來寄語唔好嘗試揣摩紅線喺邊，「答案永遠超乎我們常人理解」。佢已預算刑期會遠多於3個月、即時遭褫奪議員資格，所以之前主動辭任荃灣區議員，其後透過Patreon形式支援社區服務處繼續營運，目前經費可維持地區據點至明年農曆新年前。
翻查資料，六四案共有12人今日會認罪，除咗趙恩來，仲包括何秀蘭、楊森、梁國華、何俊仁、梁國雄、陳皓桓、尹兆堅、朱凱廸、張文光、郭永健及麥海華。
（原文刊載《明報》2021年9月9日）
